സ്വന്തമായി വീടോ സ്ഥിര വരുമാനമോ ഇല്ലാത്ത അഭയ സ്ഥാനമില്ലാതെ കഴിയുന്ന വിധവകളുടെ (ഭര്‍ത്താവ് മരിച്ചവര്‍, ഭര്‍ത്താവ് ഉപേക്ഷിച്ച് 7 വര്‍ഷം അയവര്‍) ജീവിതം മെച്ചപ്പെടുത്തുന്നതിനും അവരെ സംരക്ഷിക്കുന്നതിനുമാണ് ഈ പദ്ധതി ലക്ഷ്യമിടുന്നത്. ഇങ്ങനെയുള്ള വിധവകളെ സംരക്ഷിക്കുന്ന കുടുംബത്തിലെ ഉത്തരവാദിത്വപ്പെട്ട വ്യക്തിയ്ക്ക് മാസം 1000 രൂപ ധനസഹായം നല്‍കുന്ന പദ്ധതിയാണ് 'അഭയ കിരണം'
പദ്ധതി മാനദണ്ഡം
- ഗുണഭോക്താവായി തെരഞ്ഞടുക്കുന്ന അഗതികളായ വിധവകള്‍ക്ക് 50 വയസ്സിന് മുകളില്‍ പ്രായമുണ്ടായിരിക്കണം.
- വാര്‍ഷിക വരുമാന പരിധി ഒരു ലക്ഷം രൂപയില്‍ കവിയാന്‍ പാടില്ല.
- സ്വന്തമായി വീടോ സ്ഥലമോ ഉണ്ടായിരിക്കുവാന്‍ പാടില്ല.
- സര്‍വ്വീസ് പെന്‍ഷന്‍/ഫാമിലി പെന്‍ഷന്‍ എന്നിവ കൈപ്പറ്റുന്നവരാകരുത്.
- പ്രായ പൂര്‍ത്തിയായ മക്കള്‍ ഉണ്ടായിരിക്കുവാന്‍ പാടില്ല.
- അപേക്ഷക വിധവയാണെന്നും (ഭര്‍ത്താവ് മരിച്ചവരോ ഭര്‍ത്താവ് ഉപേക്ഷിച്ച് 7 വര്‍ഷമായവരോ ആണെന്നും) ബന്ധുവിന്റെ പരിചരണത്തില്‍ കഴിയുന്ന വ്യക്തിയാണെന്നും വില്ലേജ് ഓഫീസര്‍ സര്‍ട്ടിഫൈ ചെയ്തിരിക്കണം.
- അപേക്ഷക ഏതെങ്കിലും സ്ഥാപനത്തിലെ അന്തേവാസിയാകാന്‍ പാടില്ല.
അപേക്ഷിക്കേണ്ട വിധവും ഹാജരാക്കേണ്ട രേഖകളും
- അപേക്ഷ ഫോറം (നിശ്ചിത മാതൃകയിലുള്ളത്.)
- വയസ്സ് തെളിയിക്കുന്നതിനുള്ള രേഖകള്‍ (സ്കുൂള്‍ സര്‍ട്ടിഫിക്കറ്റ്, ഇലക്ഷന്‍ ഐ.ഡി കാര്‍ഡ്, ആധാര്‍ കാര്‍ഡ് എന്നിവയില്‍ ഏതെങ്കിലും കോപ്പി)
- വരുമാന സര്‍ട്ടിഫിക്കറ്റ് /മുന്‍ഗണനാ ലിസ്റ്റില്‍പ്പെട്ട റേഷന്‍ കാര്‍ഡ് കോപ്പി
- അപേക്ഷക ബന്ധുവിന്റെ സംരക്ഷണത്തിലാണെന്നും വിധവയാണെന്നുമുള്ള രേഖ (വില്ലേജ് ഓഫീസര്‍ നല്‍കിയത് മാനദണ്ഡത്തില്‍ കാണിച്ച പ്രകാരം)
- അപേക്ഷകയുടെയും സംരക്ഷണം നല്‍കുന്നയാളിന്റേയും പേരിലുള്ള ജോയിന്റ് അക്കൗണ്ട് ബാങ്ക് പാസ്സ് ബുക്ക് കോപ്പി .
- അപേക്ഷകള്‍ ശിശു വികസന പദ്ധതി ഓഫീസര്‍ മുഖേനെ സമര്‍പ്പിക്കേണ്ടതാണ്.